Халқ таълими вазирлиги мутасаддилари Шароф Рашидов ва Зарбдор туманларидаги таълим муассалари фаолияти билан танишди.
Дастлаб, Шароф Рашидов туманидаги 36-мактабда бўлиб, ўқувчиларни касб-ҳунарга йўналтириш борасида амалга оширилаётган ишлар, қизларни тикувчиликка ўргатиш хонаси билан танишди, 11-синф битирувчилари билан мактабни тамомлаш арафасида келажак режалари ҳақида мулоқот қилди.
Битирувчиларга катта ҳаётда омад тилаб, касбларни тўғри танлаш муҳимлиги, бу шунчаки қизиқиш, ёки орзу-хавас эмас, ўша касбнинг истиқболи, ҳаётнинг фаровонлигини таъминлашга кафолат бўлишини мисоллар билан тушунтириб берди. 4 нафар муваффақиятга эришган ўқувчига ноутбук, мактабга эса телевизор тақдим этилди.
Кейинги манзил Зарбдор туманидаги 25-сонли мактаб бўлиб, ўқувчиларга яратилган шароитлар билан танишди. Айни вақтда 210 ўринга мўлжалланган мактабда қарийб 500 нафар ўқувчи 2 навбатда таълим олмоқда, келгусида аҳоли ўсишини инобатга олиб, қўшимча ўқув биноси қуриш учун 2023 йилги Инвестиция дастурига таклиф киритиладиган бўлди.
Мазкур мактабда ҳам битирувчилар билан мулоқот қилиниб, савол-жавобларда фаол қатнашган 2 нафар ўқувчига ноутбук тақдим этилди.
Шунингдек, Зарбдор туманида жойлашган 1-ва 2-сонли алоҳида таълимга эҳтиёжлари мавжуд болалар учун мўлжалланган мактаб-интернатларида бўлиб, ўқувчиларга таълим олиш ва касб ўрганишлари учун яратилган шароитлар эътироф этилди.
Мазкур таълим муассасаси педагогларига болаларни жамиятга мослашуви, инклюзив таълим орқали тенгдошлари орасида муносиб ўрнини топишига ўргатиш муҳимлиги таъкидланди. Икки мактаб интернатга телевизор тақдим этилди.
