Xalq taʼlimi vazirligi mutasaddilari Sharof Rashidov va Zarbdor tumanlaridagi taʼlim muassalari faoliyati bilan tanishdi.
Dastlab, Sharof Rashidov tumanidagi 36-maktabda bo‘lib, o‘quvchilarni kasb-hunarga yo‘naltirish borasida amalga oshirilayotgan ishlar, qizlarni tikuvchilikka o‘rgatish xonasi bilan tanishdi, 11-sinf bitiruvchilari bilan maktabni tamomlash arafasida kelajak rejalari haqida muloqot qildi.
Bitiruvchilarga katta hayotda omad tilab, kasblarni to‘g‘ri tanlash muhimligi, bu shunchaki qiziqish, yoki orzu-xavas emas, o‘sha kasbning istiqboli, hayotning farovonligini taʼminlashga kafolat bo‘lishini misollar bilan tushuntirib berdi. 4 nafar muvaffaqiyatga erishgan o‘quvchiga noutbuk, maktabga esa televizor taqdim etildi.
Keyingi manzil Zarbdor tumanidagi 25-sonli maktab bo‘lib, o‘quvchilarga yaratilgan sharoitlar bilan tanishdi. Ayni vaqtda 210 o‘ringa mo‘ljallangan maktabda qariyb 500 nafar o‘quvchi 2 navbatda taʼlim olmoqda, kelgusida aholi o‘sishini inobatga olib, qo‘shimcha o‘quv binosi qurish uchun 2023 yilgi Investitsiya dasturiga taklif kiritiladigan bo‘ldi.
Mazkur maktabda ham bitiruvchilar bilan muloqot qilinib, savol-javoblarda faol qatnashgan 2 nafar o‘quvchiga noutbuk taqdim etildi.
Shuningdek, Zarbdor tumanida joylashgan 1-va 2-sonli alohida taʼlimga ehtiyojlari mavjud bolalar uchun mo‘ljallangan maktab-internatlarida bo‘lib, o‘quvchilarga taʼlim olish va kasb o‘rganishlari uchun yaratilgan sharoitlar eʼtirof etildi.
Mazkur taʼlim muassasasi pedagoglariga bolalarni jamiyatga moslashuvi, inklyuziv taʼlim orqali tengdoshlari orasida munosib o‘rnini topishiga o‘rgatish muhimligi taʼkidlandi. Ikki maktab internatga televizor taqdim etildi.
