Мактабгача ва мактаб таълими вазирининг биринчи ўринбосари Усмон Шарифходжаев таълим-тарбия жараёнларини яхшилаш учун бириктирилган мактаб директорлари билан мулоқот қилди.

Давлатимиз раҳбари томонидан жорий йилнинг 26 январь куни мактаб таълими сифатини яхшилаш чора-тадбирларига оид тақдимот давомида берилган топшириқларда Мактабгача ва мактаб таълими вазири ва унинг ўринбосарларининг ҳар бирига мактабларда таълим-тарбия жараёни ва мактаб муҳитини яхшилаш бўйича мактаблар бириктирилди.

Мактабгача ва мактаб таълими вазирининг биринчи ўринбосари Усмон Шарифходжаев бу борада бириктирилган мактаблар билан мулоқот қилди.

Ушбу мулоқот давомида:

➖ бириктирилган мактабларда таълим сифати ва муҳитини яхшилаш,

➖ўқитувчиларнинг сифат кўрсаткичларини ошириш,

➖ўқувчиларни касбга ўқитиш,

➖танлов фанларини жорий этиш ҳамда

➖мактабларнинг 2024 йилда эришиладиган таълим сифатини ошириш бўйича мақсадли кўрсаткичлари муҳокама қилиниб, мактаб директорларидан таклифлар олинди.

Шунингдек, ҳар бир бириктирилган мактаблардаги таълим-тарбия жараёнини таҳлил қилиш, ўқитувчилар билан учрашиш ва амалий ёрдам кўрсатиш мақсадида жойларга чиқиш графиги белгиланди.