Жорий ўқув йилида 1200 та мактабларда ота-оналар қоғозли кундалик сотиб олмайди, электрон кундаликдан фойдаланади

 

Ҳурматли ота-оналар!

Бу йилги янги ўқув йилидан бошлаб Республикамизнинг 1200 та мактабида қоғоз кундаликлар ва журналлар бекор қилинади. Бу бир томондан ўқитувчиларни қоғоз журналларни тўлдириш ва ҳисоботларни қўлда ёзишга кетадиган вақтларини иқтисод қилиш билан бирга ота-оналар ва мактаб орасида электрон ҳамкорликни янада юқори даражага кўтаришга хизмат қилади.

Электрон кундалик сизларга онлайн режимда мактабдаги барча воқеалар ва фарзандингизнинг баҳоларидан хабардор бўлиш, синф раҳбарлари ва бошқа ўқитувчилар билан алоқани ушлаб туриш ҳамда болага таълим жараёнидаги қийинчиликларни енгиб ўтишига ўз вақтида ёрдам бериш имконини яратади.

Kundalik.com TAS-IX зонасида жойлашган бўлиб, платформа билан ишлаганда барча операторлар, жумладан мобил операторлар томонидан интернет-трафик сарфланмайди. Фойдаланувчилар ҳақидаги ҳамма маълумотлар «Ўзбектелеком» серверларида сақланади. Бу таълим жараёнининг барча иштирокчилари ҳақидаги шахсий маълумотлар ишончли ҳимоя остида эканини билдиради.

Ушбу тизимга тўлиқ ўтиш орқали, ота-оналар синф раҳбари билан Телеграм ва бошқа мессенжерлар орқали боғланишига ҳожат қолмайди, натижада унга кетаётган трафик ҳам иқтисод қилинади ва Телеграм орқали шахсий маълумотларни тарқаб кетиши олди олинади.

Қатор тадқиқотларга кўра, ота-она назоратини ҳис қиладиган болаларнинг ўқишга қизиқиши юқори бўлади, улар дарсларда фаолроқ қатнашади ҳамда ўз истеъдодлари ва салоҳиятини кўпроқ намойиш этади. 

Охирги 2 йилда ўқитувчилар учун мажбурий бўлган 7 та ҳужжат ўрнига, фақат шу 1 дона электрон журнал тизими билан ишлаш бўйича имконият яратилди. Қоғоздан бутунлай воз кечиб, электрон журналга ўтилиши ўқитувчининг ҳам ишини енгиллаштиради ва вақтини тежаш имконини беради. Тежалган вақтни ўқитувчи ўқувчилар билан ижодий ишга ёки ўзининг касб маҳоратини оширишга сарфлаши мумкин.

Халқ таълими вазирлиги 2020-2021 ўқув йили бошланишидан олдин Тошкентдаги барча ҳамда вилоятлардаги мингга яқин мактаб ўқувчиларнинг ота-оналарига қоғоз кундалик харид қилиш ўрнига унинг электрон муқобили Kundalik.comга обуна бўлиш зарурлигини маълум қилади. Электрон Кундалик жорий этилаётган Республиканинг қолган ҳудудларидаги мактаблардаги ота-оналарга мактаб маъмурияти томонидан бу ҳақда эълон қилинади.

Kundalik.comга обуна бўлиш баҳоси қоғоз кундаликнинг ўртача баҳосига тенг (бир йилга 10 минг сўм). Дастлабки ой давомида ота-оналар тизимдан синов тариқасида фойдаланиш имконияти мавжуд.

Baham ko'ring: