ЮНEСКО Ўзбекистон биринчилардан бўлиб «Ҳикояни таржима қилинг» лойиҳасига қўшилиш таклифига ижобий жавоб қайтарганини эътироф этди

Ўзбекистон биринчилардан бўлиб ЮНEСКОнинг «Ҳикояни таржима қилинг» (Translate a Story) лойиҳасига қўшилиш таклифига ижобий жавоб қайтарган мамлакат бўлди. Рақамли кутубхона Global Digital Library (Глобал рақамли кутубхона) билан ҳамкорликда болалар учун 130 та китоб ҳамда интерактив таълим ўйинлари ўзбек тилига таржима қилинди.

«Мавжуд таълим манбаларининг лингвистик хилма-хиллиги таълим сифати учун жуда муҳимдир. Боланинг ўз она тилида таълим олиши унинг келажакдаги муваффақиятларига ижобий таъсир кўрсатиши аниқ», - дейди ЮНEСКО Бош директорининг таълим бўйича ёрдамчиси Стефания Жаннини.

Таржима қилинган китоблар Халқ таълими вазирлиги ҳузуридаги Инновация, технология ва стратегияси жамоаси томонидан Глобал рақамли кутубхонага тақдим этилди. Бадиий ҳикоялар боғча ва мактаб ёшидаги болаларнинг ўқиши учун тавсия қилинади.

Глобал рақамли кутубхона Норвегиянинг ривожланиш агентлиги (НОРAД) ҳамда бошқа ҳамкорлар томонидан Global Book Alliance таркибида ишлаб чиқилган бўлиб, ЮНEСКО уни амалга ошириш бўйича техник кўмак тақдим этиб келмоқда.

Глобал рақамли кутубхона ўқиш материалларини ҳар қандай рақамли қурилмадан уйдан бепул фойдаланиш имконини беради. Яқинда глобал рақамли кутубхонада кўзи ожиз болаларга матннинг овозли версиясини ва тасвирларнинг тавсифини тинглаш имкони пайдо бўлди.

Ҳозирда ушбу кутубхонада 73 тильда мавжуд бўлган 5000 та китобдан ташқари, кутубхонада болаларга математик маҳоратини оширишда ёрдам берадиган интерактив ўйинлар ҳам жорий этилмоқда. Ушбу ўйинлардан кўриш қобилияти паст болалар ҳам фойдаланиши учун имконият яратилган. Ўзбекистон ушбу ўйинларнинг 20 га яқинини ўзбек тилига таржима қилди.

ЮНEСКОнинг Олмаотадаги ваколатхонаси директори Криста Пиккат Ўзбекистон Халқ таълими вазирлигига ЮНEСКО билан ҳамкорлик ҳамда кўнгилли таржимонларга миннатдорлик билдирар экан, Ўзбекистон сингари бошқа мамлакатлар ҳам ушбу инновацион ташаббусга қўшилишига умид билдирди.

 

Baham ko'ring: